ხეს ყვავილობა უხდება,

ალაზანს - ზვირთთა დინება

ველს შვენის აზურმუხტება,

ჯეჯილს კი აბიბინება.

პოხიერ მიწის სახნავად

მინდორში რკინის ხარია...

- "მე ქავთარაძე გახლავარ,

შირაქში გამიხარია.

აქ ჩამიგდია კახური,

პურის ალალი მარცვალი

ცვარია ყანის მსახური,

სეტყვაა დედინაცვალი.

აზღვავდეს, ამოღაღანდეს

თავთუხი არა-გვიანი

კალოზე ოქროდ დახვავდეს

ხორბალი ბარაქიანი.

მტკიცეა, როგორც ფოლადი,

ჩემი აღთქმული პირობა,

შირაქმა მომცა დოვლათი

სამშობლომ - შრომის გმირობა."

ასე ამბობდა ვაჟკაცი,

გულს დარდი არ ამძიმებდა.

წინ გაზაფხული კაშკაშით

მზის სხივებს ამციმციმებდა.