...ჩემს ნაკვალევს გმინვით მოსდევს მამაჩემი...

მორკალული ჩემი ქედი არ აჩვენოთ,

სხივნო მზისავ,

გაიტყუეთ,

წარაფს წასცდეს...

თქვენც უბიძგეთ უფსკრულთან რომ წაბარბაცდეს,

გადასჩეხეთ -

მოისვენოს სულმა მისმა.

წყლად მიიქცეს,

არა ღრუბლად,

არა ნისლად,

თორემ ისევ არ მოიშლის კვალში დევნას,

...თუ მომისწრო,

დამუხლული მნახა მგელმა,

თუ სახეზე

შემამჩნია

სილბომ ამკრა,

არ დამზოგავს,

გაცვეთილი მაჯით დამკლავს.