მინდოდა მეგრძნო შემოდგომა თავის სისავსით,

რომ შერჩენოდა ეს ფერები რომელიც ჰქონდა...

ნაკადულების ნაპირებზე ბზინავდა ხავსი,

და ალუბალი მაყვლის ბარდთან სიზმრებზე ბჭობდა...

ჟინჟლავდა, სუსხი ძველებურად ძვლებში ატანდა...

ჩამოდიოდა მთის წვერიდან დაბლობში ნისლი...

ბოლოქანქარა დახტუნავდა ბებერ ატამთან 

და თუთის ფოთლებს გაყინვოდა ძარღვებში სისხლი...

გადაბმულ ვაზებს აეწიათ თითქოს საყელო,

წნელის ღობეს კი გარღვეოდა მკერდთან პერანგი...

სარკმელს აჰკვროდა იასამნის შიშველი ღერო

და ყეფდა ძაღლი მეზობლისა ხმის ჩახლეჩამდი...