ნუ დაიჭერ პეპელას:

შენს ხელში რომ მოხვდება,

დიდხანს აღარ იცოცხლებს,

უსათუოდ მოკვდება.

აზიზია... ვერ იტანს

ქარიშხალს და წვიმასა,

მოკლე დღე აქვს საბრალოს,

შენ კი უსპობ იმასაც!

დე, იფრინოს, ილაღოს,

შესვას ტკბილი სურნელი,

ჩვენი სიხარულია,

ჩვენი კარგის მსურველი.

მეგობრები შენც ხომ გყავს,

მიჩნეული ტოლებად,

ჩვენ კი როგორ ვივარგოთ,

თუ ის არ გვეყოლება?

ჩამოვჭკნებით უიღბლოდ,

უმურაზოდ დავრჩებით, -

ვიღამ ააცქრიალოს

ჩვენი კონტა ფარჩები?

ო, ნუ იჭერთ პეპელას:

თქვენს ხელში რომ მოხვდება,

დიდხანს აღარ იცოცხლებს,

უსათუოდ მოკვდება.