გაზაფხული გვიღიმის,

ზღვა ლივლივებს კრიალა,

ქარმა ნისლი წახვეტა,

შორს, შორს გადიგრიალა.

გაზაფხული მოვიდა,

ამოდიან იები,

აყვავილდნენ ერთბაშად,

თეთრი მაგნოლიები.

მზე ცხრათვალა მიღიმის

დედის ლურჯი თვალებით,

თავზე ქოლგას მახურავს

ტანწერწეტა პალმები.

გაზაფხული მოვიდა,

ციდან სხივნი მოჰქრიან

და ელვარებს ზღვის პირას

თეთრი სანატორია.

გაზაფხული მოვიდა,

ამოდიან იები

და ჰყვავიან, ჰყვავიან

თეთრი მაგნოლიები.