შემოვდგი ფეხი, გილოცავთ, 

გწყალობდეთ წმინდა ბასილი, 

იმისი მადლით იყავით 

პურით და ღვინით ავსილი.

ჩემს ნაფეხურსა კვალი აჩნს

წმინდისა ანგელოზისა:

ისა გლოცავდეთ, გფარვიდეთ,

უფლის მარჯვენით რომ ზისა!

გულზე ხატ-მისვენებული

მოვდივარ, მომიხარიან,

მადლი უფლისა მომიძღვის,

წმინდანნი ჩემთან არიან;

თელის ტაბაკი მიჭირავს,

სამთლებით გაჩაღებული,

ზედ ხორბალია, პურ-ღვინო,

ოქრო და ვერცხლი ქებული.

ზედვე აწყვია: ვაშლები,

ალვა და გოზინაყია,

ქერი, თაფლი და ჩურჩხელა

და ერთიც პატარა ტყვია.

ეს მოხვდეს თქვენსა მოშურნეს

და დაგიმარცხდეთ მტერია;

განათლდეს ჩვენი ქვეყანა,

გამრავლდეს ჩვენი ერია!..