რა ტკბილია ჩვენი ენა, 

დაუკვირდი კარგად.

დინჯად, წყნარად ისაუბრე,

ასოებს ნუ ჰკარგავ.

"რ"-ს მაგივრად "ლ" არა თქვა,

არ იქნება სწორი.

"ს"-დან "შ" მდე თვით ანბანში

მანძილია შორი.

სად გაქვს ცერი, რომ გკითხავენ,

ამბობ: - "აი, ცელი".

ცელი კიდევ სულ სხვა არის,

ბალახების მჭრელი.

გკითხეს: - დედა შინ არ არის? -

შენ პასუხობ: - "ალი".

"ალი" ქვეყნად გამიგია,

მხოლოდ ცეცხლის ალი.

რა ტკბილია ჩვენი ენა,

დაუკვირდი კარგად.

დინჯად წყნარად ისაუბრე,

ასოებს ნუ ჰკარგავ.