დედაც შენა ხარ, მამაც,

სისხლიც, მშვენიერ-მშვენი,

თუ ვზრდით ჭკვიანს და მამაცს, -

შენით, ეს მხოლოდ შენით!

შენ ხარ წყალობა ღმერთის,

სიცოცხლის წყარო ერის.

შენა ხარ ერთადერთი,

რითაც ვცოცხლობთ და ვმღერით!

ლექსიც შენა ხარ, ხმალიც...

ვკოცნი, შენს უკვდავ ლივლივს.

შენ ხარ იმედი ხვალის,

შენით, მარადჟამს ვივლით!

ჩვენს სისხლს - ცხელსა და უკვდავს -

გქვია ქართული ენა,

მტრებს - შხამიან გულს უკლავ,

ქართველისთვის ხარ ლხენა!

ჩვენს სასიცოცხლოდ, მხსნელად -

შენ მოგავლინა ზენამ!

დედაც შენა ხარ, მამაც, -

სისხლიც, მშვენიერ-მშვენი,

თუ ვზრდით ჭკვიანს და მამაცს,

შენით, ეს მხოლოდ შენით!