არგვეთი მოსპო მურვან ყრუმ

დედა ვატირე მე მისი!

გულს შავი მიკლავს მე ნამყო

და არანაკლებ მერმისი.

კახეთი მოსრა აბასმა

დედა ვატირე მე მისიც!

ტკბილი ჩაგვშხამდა ჭამა-სმა,

ძილი წაგვერთვა ნებისი.

ქართლი გათქერა თემურმა

დედა ვთქვა?! - რა ვთქვა მე მისი?!

ვინ მოთვლის, თავდადებული

რამდენი მოკვდა ერისთვის.

მაგრამ ვერც ერთმა მტარვალმა

ხოში ვერ ჩაკლა ქეიფის;

კვლავაც ფეხზეა თამადა,

რაც, - რასაც ნიშნავს, - ქე იცი!