იბერიელთა სოფელი… მაღალ-მაღალი ცხენები…

ხალიბის ფოლადს ადნობენ მამაცი ხალიბელები,

პირველყოფილი სამჭედლო - გრდემლი და ურო ძლიერი,

ქართულ იარაღს აწრთობენ მამაცი იბერიელნი.

კვერითხუროი ვეება, რვალის და რკინის მჭედელი

და საბერველი, ვეშაპის ყბასავით გაუხედნელი.

უგანივრესი ფილტვები, ჰაერი დაჟანგებული.

ბაასი: ჭექა-ქუხილი და ერი აჯანყებული.

ქურაში ცეცხლის ენები - წითელი აბრეშუმები,

კედლებზე ახალთ-ახალი, თხუტმეტწყრთიანი შუბები,

უზარმაზარი ფანჯრები, გაჭრილი თაღებამდისა,

დასახარჯავი ხანჯლები და პერანგები ნაბდისა!

იბერიელთა სოფელი… მაღალ-მაღალი ცხენები…

ხალიბის ფოლადს ადნობენ მამაცი ხალიბელები.

პირველყოფილი სამჭედლო - გრდემლი და ურო ძლიერი,

ქართულ იარაღს აწრთობენ მამაცი იბერიელნი.