მოიარე საქართველო,

ჩვენი მთა და ჩვენი ბარი,

ზაფხულობით, როცა ყველგან

იკეტება სკოლის კარი, -

რა სავსეა ჩვენი მხარე,

რას არ ნახავს კაცის თვალი;

ყოველ მხრიდან დაბრუნდები

სილამაზის ეშხით მთვრალი.

აქეთ ტევრი უდაბური,

იქით ჭალა ატეხილი,

მარად თოვლში, მარად ტყეში

კავკასიის მთაგრეხილი.

ბუნებაში ყველგან რაღაც

საიდუმლო გვემალება,

მათი ცოდნა, დაუფლება

ყოველ ჩვენგანს ევალება.

რაც გვასწავლეს წინაპრებმა,

რაც აგვიხსნეს ჩვენთა ძველთა,

რისი ცოდნაც შეუნახავთ

ქვეყანაზე წარსულ წელთა,

შეისწავლე, დაიხსომე,

ვით საყვარელ ლექსის პწკარი...

მოიარე საქართველო,

ჩვენი მთა და ჩვენი ბარი.