მე ხომ არ ვამბობ, დააბრუნოთ ძველი ხატები!

ოპიზრის ჯვრები!

ლურჯი თასები!

პაპის ქამარი! პაპის-პაპის ვერცხლის ხანჯალი!

გვირგვინი მეფის!

სადედოფლო თავსაბურავი!

მაგრამ მიწა, ჩვენი მიწა,

მიწა ქართული! -

გამოხვეული ნაჩქარევად რაღაც ქაღალდში,

და თავსაფრებით, ცხვირსახოცით თან წაღებული -

უნდა უთუოდ დააბრუნოთ! ო, უსათუოდ!

რომ მიწას ქართულს მიემატოს მიწა ქართული!

მცირე ისედაც!

უმცირესი!

უუმცირესი! -

ო, დააბრუნეთ! დააბრუნეთ მიწა ქართული!