როცა დღე, ომის გრიალით სავსე,

ცეცხლის ალმურში დაიბინდება,

სამშობლოს ვარსკვლავს მე ვხედავ ცაზე

და ჩემს გულშიაც სხივი ინთება.

როცა ღამესაც ხანძარი დასწვავს

და ისიც გრგვინვით გადაფრინდება,

მაშინაც ვხედავ სამშობლოს ვარსკვლავს

და გული საფრთხეს არ უშინდება.

ყოველთვის, როცა ამ ცეცხლის გზაზე

გულს გამხნევების ძალა სჭირდება,

სამშობლოს ვარსკვლავს შევხედავ ცაზე

და მღვრიე ფიქრი დამეწმინდება.