შვილებს არ შეხვდეთ გზაზე ეკალი?

ნუ დამილოცავთ შვილებს ამრიგად, -

მომავალს ბრძოლა სჭირდება როცა

წყევლას უფრო ჰგავს ამგვარი ლოცვა!

შვილებს არ შეხვდეთ გზაზე ეკალი?

ასეთი ლოცვა ღმერთმა აშოროთ,

მაშ ვინ ჩაიცვას ტანზე ბეგთარი,

ვინ უერთგულოს მაშინ სამშობლოს?

ახლაც გვინათებს მომავალს მზე ვით,

ჩვენი შამქორი, ჩვენი მარაბდა,

ყველას რომ ევლო უეკლო გზებით

ამ ლურჯ მთებს ვინღა დაიფარავდა?

ვინ ააგებდა გრემსა და გელათს,

ვარძიას - ცაზე აკრული ჭერით,

უეკლო გზით რომ იაროს ყველამ

ვინ გაამაგროს მამულის ბჭენი.

როგორ შევხედო პაატას თვალებს

მამულისათვის ჩამქრალს, დარდიანს,

იმ სახელოვან დედებს და ქალებს,

მეფე ერეკლეს, ცოტნე დადიანს!

შვილებს არ შეხვდეთ გზაზე ეკალი?

ასეთი ლოცვა ღმერთმა აშოროს,

მაშ, ვინ ჩაიცვას ტანზე ბეგთარი

ვინ უერთგულოს მაშინ სამშობლოს.

ეს არის ჩემი ლოცვა და ფიცი

უნდა იმძლავრონ და იარწივონ

სამშობლოსათვის დაღვარონ სისხლი

და თუ დასჭირდა, თავიც გასწირონ!