ერთობა და თანასწორობა, 

გულით ძმობა, სიყვარული,

ყველა ერთად ჯერჯერობით

ციხეშია დამწყვდეული.

მშიერს, მწყურვალს, შიშველს, ტიტველს

ინახავენ, როგორც მხეცსა, 

განსაცდელსა და სატანჯველს

უმზადებენ მრავალკეცსა.

სხვათაშორის, გალიაში, 

ჰყავთ მოხუცი დამწყვდეული;

ის არ ზრუნავს თავის თავზე... 

სხვებისათვის უძგერს გული!...

ჰფიქრობს ღმერთო, რა შეგცოდეს,

რომ აწვალებ ამდენ სულსა?

და რად აძლევ გამარჯვებას

მას, ვინც სდევნის სიყვარულსა?

ყური მოჰკრა, საპასუხოდ,

რომ ჩამოჰკრეს სადღაც ზარებს, 

და ის რეკვა დაჩაგრულებს

გამარჯვებას მიახარებს:

“ქრისტე აღსდგა!” აღსდგა მკვდრეთით

ის ნაგვემი!... და ჯვარცმული!...

და ამიერ ქვეყანაზედ 

განმტკიცდება სიყვარული.