გადასძახის ქუჩა ქუჩას,

ხიდი ხიდს და

დაბა დაბას:

ულოცავენ ერთმანეთს

დიდი ბიჭის დაბადებას!

ულოცავენ ერთმანეთს

ძმები ძმების, დები დების,

დები, ძმების ნატრულები,

დღეს, იმ ბიჭის დაბადების!

უსურვებენ კაი დღის და

კაი ღამის დაბედებას,

ულოცავენ ერთმანეთს

ლომის - მხსნელის - დაბადებას!

მიუჩოჩეს კუნძი კუნძს და

კეცი კეცს და ტაფა ტაფას:

მწვადებს წვავენ, მილოცავენ

მეც მესიის დაბადებას!

მოელიან მზე-ბატონის

მშვილდოსანში დაბუდებას! -

მშვილდოსანი დაერქმევა

მის დღეს - მის დიდ დაბადებას!