მთლად ქვეყანას მირჩევნიხარ,

შენ კი გინდა ცრემლი ვღვარო;

რაგინდ ტანჯვა მომაყენო,

მაინც გეტყვი, - ჩემი ხარო.

სამდურავსაც არ შეგასმენ,

დანა დამკრა, სისხლი ვღვარო,

ქვა მომაბა, წყალს ჩამაგდო,

დავიყვირებ, - ჩემი ხარო.

მაინც თითებზე გემთხვევი,

თუგინდ თვალები დამთხარო,

ბრმად დავივლი, შენ სახსოვრად

სულ ვიყვირებ, - ჩემი ხარო.

ცოცხლად მიწაში დამმარხო,

ზედ ქვა-ლოდი დამაყარო,

ვიტყვი, - ღმერთო, აპატიე,

ამოგძახებ, - ჩემი ხარო.

ვინიცობა ადრე მოვკვდე,

გევედრები, დამიბარო,

იმქვეყანას შენთან მოვალ,

იქაც გეტყვი, - ჩემი ხარო.

ამასა გთხოვ, ტკბილი ენით

იეთიმ-გურჯი გამახარო,

შენ საკუთარ კალმად ვიქცე,

სულ გიმღერო, - ჩემი ხარო.