მიდის, მიფრინავს წუთისოფელი,

ბრუნავს ქვეყანა, ტრიალებს ჩარხი,

მიჰქრის სიცოცხლე, მისდევს სიკვდილი,

ათასნაირად ირევა ხალხი.

საით სიცილი, საით ხარხარი,

საით გოდება, სად ჩანგის დაკვრა,

სად ფუფუნება, ტკბილი ცხოვრება,

სად გაჭირვება, სიკვდილის ნატვრა.

ზოგან ნათლობა, ქეიფი, ობა,

ზოგან ცხედრისა სუდარით მკობა,

ზოგან ქონების დაუთვლელობა,

ზოგან შიმშილი და ღარიბობა.

სად კუბო მიაქვთ, საით მზითები,

საით ტირილი, სად ქორწილია,

სად მკვდარი მიჰყავთ, სად რძალი მოჰყავთ

საით გლოვობენ და სად ლხინია.

სოფლად მოდიან, მიწას მიდიან,

სიხარულს უკან დაჰყვება მწარე,

მაშ, იეთიმ-გურჯო, შენც მოემზადე,

ყველას მოგველის შავი სამარე!