როგორც მწვრთნელი შიშითა და ძრწოლით

შორიახლო ლომს მიჰყვება ბებერს,

რუსთაველზე მოჰყვებოდა ცოლი

საქართველოს პოეტების მეფეს.

სტუდენტებმა მოიხადეს ქუდი

და ღიმილი მგოსანს მიაგებეს.

ლუდხანაში ჩამოუსხეს ლუდი

საქართველოს პოეტების მეფეს.

ერთი ჭიქით, ერთი ჭიქით მთვრალი

ჰყვება: “სისხლით ქრისტესავით მღებეს!”

მთაწმინდისკენ გაუშტერდა თვალი

საქართველოს პოეტების მეფეს.

აწ პარნასი გულში იკრავს სევდით

ბილიკების შეუშინარ მძებნელს -

სძინავს ბაღში სწორუპოვართ გვერდით

საქართველოს პოეტების მეფეს.