ლექსს სჭირდება გული. ლექსს სჭირდება ღვიძლი.

ლექსს სჭირდება ცრემლი. ლექსს სჭირდება სისხლი.

ლექსს სჭირდება ფეხი. ლექსს სჭირდება ხელი.

ლექსს სჭირდება მკერდი. ლექსს სჭირდება წელი.

ლექსს სჭირდება ტვინი. ლექსს სჭირდება შუბლი.

ლექსს სჭირდება ლარი. ლექსს სჭირდება რუბლი.

ლექსს სჭირდება სექსი - თუ მართლაა ლექსი.

ლექსს სჭირდება რისხვით აწეული წარბი!

შვილიშვილებისთვის ლექსს სჭირდება ბარბი!

ლექსს სჭირდება ღვინო. ლექსს სჭირდება ხილი.

უძილობა - ბევრი. ცოტა-ცოტა - ძილი.

ლექსს სჭირდება მუშტი. ლექსს სჭირდება შხამი.

საუკუნე - ბევრი. სამი-ოთხი - წამი.

რა თქმა უნდა-ღამით. რა თქმა უნდა-დღისით -

ერთგულება შენი. ერთგულება მისი.

ლექსს სჭირდება ფიცი. ლექსს სჭირდება ლექსი.

ლექსს სჭირდება ტორტი. ლექსს სჭირდება კექსი.

ლექსს სჭირდება დეკა. ლექსს სჭირდება ღვია.

ლექსს სჭირდება მკერდი და იმ მკერდში-ტყვია.

ლექსს სჭირდება ქედი. ლექსს სჭირდება მოლი.

ლექსს სჭირდება ცოლი (ხან - მეორე ცოლი).

ლექსს სჭირდება მკერდში გარჭობილი დანა,

დაძინება მერე და მკვდარ დედის ნანა...

ლექსს სჭირდება ცხვარი და ამ ცხვრისთვის -

მწყემსი...

...ეს არ ვიცი ოღონდ -

ვის სჭირდება ლექსი...