ვის რა ვუთხრა?

ვის შევჩივლო?

ანდა ვის რა დავუბარო?

შენა ხარ და შენც იცინი

უდარდელად, ალუბალო!..

დანგრეულა ეკლესია,

გარეშემო სახლობს უცხო,

აქ დამპყრობელს ჟინი თურმე

დრომ აქამდე ვერ დაუცხრო.

თოფის სროლით აფრთხობს მთავარ

ანგელოსს და ანგელოსებს,

ქვას და კრამიტს აცლის საყდარს

და იშენებს იმით ბოსელს.

ვის რა ვუთხრა?

ვის შევჩივლო?

ანდა ვის რა დავუბარო?

მე ცრემლები როცა მახრჩობს,

შენ იცინი, ალუბალო!..