სველ მატიტელებზე მოვრბივარ,

გავთელე გვირილა ნაწვიმი,

მე დამარცხებული გნოლი ვარ,

შენ - გამარჯვებული არწივი.

გეძახის უძირო ოცნება,

შენს წინ მსურს მუხლებზე დავეშვა,

კერპი ხარ, მოვსულვარ მლოცველად

და გულში ვიხუტებ კაეშანს.

ვფართხალებ ეჭვების ფაცერში,

ჩემს უმწეობაზე ვბრაზდები,

გზას გულისფანცქალით გავცქერი

და არც მსურს ვიწამო სხვა გზები...

მოდიხარ ცხენდაცხენ ნავარდით,

არ გინდა გახედვა არსაით,

მსურს ტოროლასავით ავვარდე

და შენს გულს შევაწყდე ცასავით.

გულამოვარდნილი მორბიხარ,

გათელე გზაწვრილი ნაწვიმი...

მე - გამარჯვებული გნოლი ვარ,

შენ - შენ დამარცხებული არწივი.