ვიცი, რომ მზითვად არ მომცემენ "ვეფხისტყაოსანს", არც წასაღებად დაჰკეცავენ ქირმანის შალებს, არც ქართულ კაბას ჩამაცმევენ ჯვარის საწერად, არც ვერცხლის ქამარს მომავლებენ დარდიან წელზე. ბედნიერებას მომილოცავთ უცხო კილოზე, მრავალ წერილებს გამაყოლებთ გზის საპოვნელად, მრავალ მოკითხვას დავუხვდები, ვით მკვდარ მიმოზებს. სიყვარულის ცისფერ სუნთქვაში, დიდი იქნება აღტაცება მზეგამართული, უხვი კოცნები, ვით კახეთში ღვინის მარნები, და სადღეგრძელოს მოიტაცებს სიტყვა ქართული. გულის პასუხი ყარამფილებს ვეღარ დაყნოსავს და მე ვიქნები სიკვდილივით გაუხარელი, რადგან მზითევში არ მომცემენ "ვეფხისტყაოსანს”. |
პოეზიის გვერდი • • • |