მხოლოდ ერთი დღე წელიწადში ვიუქმო მინდა.

ოფელიას დღე - საოცნებო როგორც მირაჟი.

შემოდგომაზე გაფითრდება ჰაერი წმინდა

მზეთუნახავი გამოჩნდება ცის დაირაში.

წვიმის ასული - სევდიანი და უწყინარი

ავდარის წვეთებს ჩამოჰყვება ვით ანგელოსი.

იმას მიიღებს აღმატებით ლურჯი მდინარე,

დაიცრემლება ჟანგიანი სახე მდელოსი.

ეს დღე იუქმეთ ჩემთან ერთად თქვენ პოეტებო,

პრინცის საცოლოს გაგიჟებულს ეცით თაყვანი.

დილიდან ახალ იორდანეს ბრბო მოედება

იქნება ქალი ტალღებიდან ამოსაყვანი.