სიზმრები მაქვს არეული:

მზისეული...

მთვარეული...

ხან - ნამეტან ფხიზლეული,

ხან - ნამეტნავ მთვრალეული!..

ხან - ნამეტურ დაწმენდილი,

ხან - ნამეტურ ამღვრეული...

ხან - ზეცამდე აწვდენილი,

ხან - უფსკრულში ჩარღვეული!..

ბნელს ვერ ფანტავს ცისკარიც კი,

სულში ვერც მზემ ილამპრულა...

სიზმრის ახსნა ვინც არ იცის -

მე ავუხსნი წინაპრულად!..

... ერთხელ უნდა შეგახსენოთ

ძველად თქმული, არ ახალი:

ეს ცხოვრება სიზმარია, -

წამისწამში სანახავი!..

ამ ერთ წამში უნდა იგრძნო

საუკუნო ნეტარება..

აბა, ისე ჩვენი ყოფა

მთლად ჯოჯოხეთს ედარება!..

სიზმრები მაქვს არეული:

მთვარეული!..

მზისეული...

ხან - ნამეტურ მთვრალეული,

ხან - ნამეტურ ფხიზლეული!..