რომ არ დაუჭკნოს სული დარდებმა,

ქალს გაფრთხილება მარადჟამს უნდა,

თორემ შენს ხელში ისე დადნება,

ვითარცა თოვლის უმწეო გუნდა.

ქალი ოცნების ჯადოქარია,

ქალს ნუ ჩახედავ თვალებში მრუდად...

გახსოვდეს, ქალი მაინც ქალია,

მოფერება და ალერსი უნდა.

თუ გსურს დღე ჰქონდეს მარად მზიანი,

ქალს ნუ უღიმი ფარისევლურად...

ყველა ქალი ხომ ლამაზი არის,

ლამაზი არის თავისებურად...

ქალი ყვავილს ჰგავს გიშრის ხალიანს,

ვისი ღიმილიც შენ ასე გსურდა...

ქალი სიცოცხლის ნაპერწკალია

და რომ არ ჩაქრეს, სხვა სითბო უნდა.

ქალი მზეა და არა მყინვარი,

ქალს ნუ შეხვდები განრისხებულად,

ყველა ქალი ხომ ამაყი არის,

ამაყი არის თავისებურად...

ქალი ფარია, ქალი ხმალია,

შენი მხსნელი და ფარეში მუდამ...

გახსოვდეს, ქალი მაინც ქალია,

სიყვარული და ალერსი უნდა.