ო, სიყვარულო, ეს შენ ხარ მხოლოდ

ჩემი სასჯელი და ჩემი ჯილდო.

გინდ შენმა ძალამ გადამიყოლოს,

მაინც მსურს შენით ზიზღს შევეჭიდო.

შენი ძალით და შენი შეწევნით

მე ვყვავი ისე, ვით ყვავის ცეცხლი.

შენ ხარ ზვავი და შენ ხარ მეწყერი,

ფრთები არწივის და ფრთები მერცხლის.

უშენოდ ყოფნას არა აქვს აზრი,

მხოლოდ შენით მაქვს ბედნიერება.

ირგვლივ ბრძოლაა, ყაყანი ბაზრის,

მე კი მივდივარ და მემღერება.

შენშია მხოლოდ ცხოვრების გემო

და სილამაზე მეძლევა შენით.

რაც უნდა მტანჯო, რაც უნდა მგვემო,

ბედნიერი ვარ მაგ განაჩენით.

ო, სიყვარულო, დაუვიწყარო,

ჩემი ამბავი დარჩება ზღაპრად,

როს დამელევა სიცოცხლის წყარო

და შორ კუნძულზე გამრიყავს აფრა.