იქნება - მეთქი! გაგრძელება იქნება მალე

სულ ახლო ხანში გაგრძელება უწევს ყველაფერს:

დაუმთავრებელ მოგონებას, შეწყვეტილ ალერსს,

ტანჯვით მიგნებულ ფიქრს, უცოდველ ბავშვის რწმენამდე.

რომ ვერ ამაღლდე, - გაოცებას და აღმაფრენას,

და შთაგონებას და ხორხიდან ამომსკდარ სიცილს,

და დაეჭვებას, და სინანულს, და ნაადრევად

იმედგადაწყვეტილ მოლოდინსაც ექნება, ვიცი.

ვიცი, ექნება გაგრძელება!.. დადგება ჟამი,

ნატვრისთვალივით გაცხადდება შვილში - მშობელი,

დროის ყამირზე კვალს გაიტანს გუთანი კალმის

და შეცნობილად გადიქცევა შეუცნობელი.

და მიეზღება საკადრისი კეთილს და ბოროტს,

და საკმარისი აღმოჩნდება სტრიქონი მხოლოდ,

ერთი მართალი, გაბედული სტრიქონი მხოლოდ,

რომ გამართლება მოენახოს კაცის ცხოვრებას!