ლამაზი თითები

გრძელი თითებით

მარცვლავდა თუთას,

თუთა ვთხოვე და

წარბი ასწია,

მაჩვენა

სამი

ლამაზი თითის

ულამაზესი კომბინაცია.

არც ვაზს ვაქებ

არც ვაზს ვაქებ, აღარც ღვინოს,

რითმას ვაქებ სასაცილოს,

ცელქმა რითმამ შეიძლება 

დედოფალთან დაგაწვინოს.

სწავლული

ჩაჰკირკიტებს არზას,

შუქს გაურბის მზის,

თუ

ტყემალზე არ ზის,

მაშინ

ჭურში ზის.

გაფრთხილება

არ ენდოთ მაგის სიცილს:

ცუდი

სიფხიზლე

იცის!

გამოცანა

სტვენს გაზაფხულის შიკრიკი,

და ღვივის,

როგორც კრამიტი,

გარეთ - ატლასი,

შიგნით კი -

999.

მეზობლები

რწყავენ პალმებს და კაქტუსებს,

მშვიდად ცხოვრობენ ასე:

ზოგი -

მეშვიდე სართულზე,

ზოგი -

მეშვიდე ცაზე.

30 ვერცხლი

მაშინ, როცა ნაზარეველს მიუსაჯეს გოლგოთა,

ოცდაათი მეტი ღირდა ვერცხლი - ვიდრე ოქრო - და

თქვენ, რომელთაც ვერცხლი გიყვართ - ციმციმა და კიაფა, -

თუ გამყიდით, არ გამყიდოთ - ოცდაათზე იაფად!

ზღვას მიუსაჯეს დუმილი

ზღვას მიუსაჯეს დუმილი,

მთვარეს -

ღრუბლების კატორღა,

ნაპირთან დარჩა კატარღა

და ერთადერთი კატაღა...

უყვარდა სიტყვის დაბეტონება

უყვარდა სიტყვის დაბეტონება:

- ქალ-ბა-ტო-ნე-ბო

და ბა-ტო-ნე-ბო!!!

გამოწვდილ ხელებს

გამოწვდილ ხელებს შეიძლება დაუგდო ხურდა,

გამოწვდილ ხელებს შეიძლება დაადო ხუნდი,

გამოწვდილ ხელებს შეიძლება ეამბორო და

გამოწვდილ ხელებს შეიძლება ენდო ბოლომდე.

სეირია

სეირია ცხოვრება,

უყურებ და ერთობი:

ერთ-ერთები ცდილობენ,

გახდნენ ერთადერთები.

მომიტინგე-მოაქციეს

უფალო, მომიტინგე-მოაქციეს

ნუ დასჯი, არამედ მოაქციე

დალოცა ბედი

დალოცა ბედი წყეული,

ჭიქა შეავსო კახურად,

მიწას მიუგდო სხეული

და ზეცა მოიმსახურა,

მეორე ათასწლეული

გალაკტიონმა დახურა.

ამაყად იჯდა

ამაყად იჯდა ტყემალზე

და გაჰყურებდა ტერასებს...

სხვადასხვა დამნაშავეთა

ცოდვებს წონიდა თემიდა...

საფლავში ისე ჩავიდა,

არ ჩამოსულა ტყემლიდან.

პოეტი პოეტის არქივში

პოეტი პოეტის არქივში თავის გვარს ეძებს და შლის,

ატყუებს საკუთარ ქვეყანას, ატყუებს საკუთარ შვილს.

ეტყობა, უფალი გაგვიწყრა, როდესაც, როცა და როს -

თავისი ცნობილი სახელის წამშლელი დასჭირდა დროს.

შეგონება

ზღვარს გაჰყევი ბედისა და უბედობის,

დააკვირდი მყობადს მრავალწახნაგიანს,

ფრთხილად! ყველა მილიონერს ნუ ენდობი:

ზოგიერთი გადაცმული გლახაკია!

დღევანდელს

დღევანდელ სასაფლაოებს

როცა ვუყურებ,

უფალო,

ვფიქრობ და ვამბობ:

უფალსაც

არ ყვარებია უფულო!

ტირანი

გააბატონა ერესი,

წალეკა წასალეკი და

ბედი ქვეყნის და ერისა

ფეხებზე კი არ ეკიდა.

სკა, სკამ, სკამს

გავიჩინე სკა,

ამაშენა სკამ,

აწი აღარ მეშინია,

თუ დავკარგავ სკამს.

აქვს ფანტაზია ბავშვის

აქვს ფანტაზია ბავშვის,

სამსართულიან სახლში

მეცხრე 

სართულზე 

ცხოვრობს.

სასაფლაოზე

აქ სახლია საზიარო...

აქ ტახტია კელაპტრის...

- საფლავებზე არ იარო:

არ გეგონოს გელათი!

მიმიკრია

მიქარა და მიგანა და ახლოს აღარ მიმიკარა,

ყველა რაზა მიმირაზა, ყველა კარი მიმიკარა, -

ავდგები და გამოვიცვლი მიმიკას და მინი კარავს

და სხვას ისე შევეჩვევი, მიმიკრია მიმიქარავს!

წვიმს

წვიმს.

მუზეუმში მანეთად

შევდივარ -

ფიროსმანებთან.

ნეტავ

- ნეტავ შოთას ანდა ვაჟას

ვინ ასწავლა წერა-კითხვა?

- დაანებეთ თავი ნაჯახს:

ვერ ამოშლით წერაქვითაც!

უღრან ტყეში

უღრან ტყეში

მორი იდო მორზე

და ისმოდა -

კოდალების მორზე.

ტაშებით

ტაშებით ნუღარ მეტაშტაშები:

შეგჭამენ ტაშის მეტასტაზები!

მონარქისტი

მონარქისტი არა ვარ,

არც მორწმუნე გლეხი ვარ,

მაგრამ

თამარ მეორე

კი მინდოდა

მეხილა.

იმძლავრა

იმძლავრა გაზის თონემ,

გლეხი დამდგარა გიდად,

თაფლი მითხარით, თორემ

ცოტნე - რამდენიც გინდათ!

მერცხალმა

მერცხალმა ისე

ჩაიჭიკჭიკ-ჩაიკისკისა,

შეშურდებოდა შტრაუსსაც და

ჩაიკოვსკისაც.

დუშმანი

ჩაუდგამს რკინის ფაცერი

და მევაჭრება დუშმანი:

- ან

ორი ღერი ფიცარი,

ან

სამიცალი ლურსმანი!

ისე გახდა

ისე გახდა ტარასი,

როგორც გახდა მინდია:

ჩონჩხის არმატურაზე

სარეცხივით ჰკიდია.

ჩალის ფასი

ევედრება ჩალა ასანთს:

- ნუ გამყიდი

ჩალის ფასად!

ებრალება ჩალა ასანთს:

ჩალას ყიდის

ცეცხლის ფასად.

გულაბი

ისე დამწიფდა გულაბი

და ისე მიყვარს გულაბი,

ამტკივდა

ხელის თითები

და მეწვის

ხელისგულები.

გალაკტიონის პორტრეტი

თუმცა ბედმა სულეთის 

მხარეს დაგაბინავა,

სადაც შენი სურათი

მხვდება,

ყველგან შინა ვარ.

საიდუმლო სერობა

საიდუმლო სერობას არ ესწრება იუდა,

მაგრამ ჩვენი თამადა მაინც განერვიულდა,

იცის ჭეშმარიტება დღეთა ამქვეყნიურთა:

სადაც ქრისტე არ არის, იქ არ მივა იუდა.

პირამიდაში

პირამიდაში სძინავს ფარაონს,

გარეთ პალმების უხმობს მარაო,

მაგრამ არ მოსწონს სააშკარაო:

მუმიამ უკეთ დამიფარაო...

- რამდენ წელიწადს გაძლებს მუმია?

- ასი ათასი - მინიმუმია!