|
ეს ერთი სიტყვა უნდა ავიხირო - მახსოვს! შენი დათვისსისხლა შავი ღვინო - მახსოვს! შენგან მოძღვნილი არყის ბოცო - მახსოვს! შენგან მოწვდილი ტახის ხორცი - მახსოვს! იორ-მუღანლოში სადილობა - მახსოვს! შენ რომ შემაყვარე ნადირობა - მახსოვს! შენ რომ ლელიანის კატა მაპოვნინე - მახსოვს! შენ არ ესროლე და მე მასროლინე - მახსოვს! მე რომ პირველი ხოხბით გავიხარე - მახსოვს! შენ რომ დაიხარე და აიყვანე - მახსოვს! ივრის ჭალები აქოჩრილი - მახსოვს! ეგ მხრები ბრეზენტით გაკოჭილი - მახსოვს! მზისგან დამწვარი გორმახები - მახსოვს! შენი თათარი ყონაღები - მახსოვს! ბოლო ხანებში გვეღლებოდი - მახსოვს! მახსოვს,ხელიდან ვეცლებოდი - მახსოვს! "მეც ვბერდები და ძაღლიც ბერდებაო" - მახსოვს! "ჰაუ,რანაირად თენდებაო!" - მახსოვს! ლექსებს მიკითხავდი კოცონთან - მახსოვს! ეს ოთხი სტრიქონი მოგწონდა - მახსოვს! |
პოეზიის გვერდი • • •  • • • მურმან ლებანიძის პოეზია |
