მე ავად ვიყავი და მკურნალს ვეძებდი,

უეცრად მოფრინდა ცისფერი ფერია,

რაღაც უცნაური გადმომცა რეცეპტი,

რომელიც ანთებულ ყაყაჩოს ფერია.

თან მითხრა ჩურჩულით: - ისეთი რამ არის,

რომ უნდა მიიღო უმცირეს დოზით,

არისო ძალიან ლამაზი წამალი,

არ დაილევაო ის სუფრის კოვზით.

იმედის ნაფლეთი გულს უცებ ეძგერა,

ვიფიქრე, იქნება როგორმე მოვრჩე:

თვალი გადავავლე, რეცეპტზე ეწერა:

"მანანას ღიმილი, კვირაში ორჯერ!"