შენ რომ ქუჩაში ვაჟი გხვდება - 

 ყოველდღე თითქმის; 

 ხან მოწყენილი, 

 ხან მხიარული... 

 ვაჟი - 

 სიმაღლით 

 შენზე ერთი მტკაველით დიდი, - 

 მძიმე ნაბიჯით მოსიარულე, - 

 ის როცა ფიქრობს, - 

 შენ ხარ ხოლმე იმისი ფიქრი.

 ღიმილი შენი 

 არ გეგონოს შენ მარტო შენი. 

 ცრემლსაც ნუ ჩასთვლი 

 ნურასოდეს 

 შენ მარტო შენად. 

 ღმერთმა ნუ ჰქნას და... 

 შენ რომ იყო გადასარჩენი, - 

 თავს არ დაზოგავს 

 ის ვაჟი შენს გადასარჩენად.

 შენ რომ ქუჩაში ვაჟი გხვდება - 

 ყოველდღე თითქმის; 

 ხან მოწყენილი, 

 ხან მხიარული... 

 ვაჟი - 

 სიმაღლით 

 შენზე ერთი მტკაველით დიდი, - 

 მძიმე ნაბიჯით მოსიარულე, - 

 შენი ერთგული კაცია იგი!