კაცობრიობის მიუძღვები ქვეყნად სათავეს

და იმნაირი მოგანიჭა ღმერთმა ბუნება,

რომ მართალია სუსტ არსებად ძმებმა ჩაგთვალეს,

მაინც ცდილობენ გამოსცადონ შენთან ცდუნება.

ხელში გიპყრია აღვირები გრძნობის სადავის,

ვინც შემოგხედავს სიყვარულით უკვე მთვრალია.

შენი ბრალია ის პირველი ცოდვაც ადამის

და მისი კაცად გადაქცევაც შენი ბრალია.

სამოთხიდანაც შენს გამო არ გამოაძევეს,

როცა სიშიშვლის აღარ შერცხვა შენი ყურება?!

ის ლამაზ თვალთა გაღმერთებას კვლავაც აგრძელებს

და მხოლოდ ჟინის დაოკებას ემსახურება...

მაგრამ რადგანაც ჩვენი მოდგმა ასე იწყება,

სანამ სამყარო იარსებებს შენთან იწვება!