ხვალ სასამართლო იმსჯელებს ჩემზე,

გამოცხადდება ხვალ განაჩენი,

ხვალ გაირკვევა რას მომისჯიან,

დავიღუპები თუ გადავრჩები.

ხვალ გამჟღავნდება უპირველესად,

რომ დამნაშავე ჩემი გულია,

რომ სიყვარული მარადიული,

მარადიულად აკრძალულია.

ხვალ გაირკვევა დანაშაული

რომ უმთავრესად ჩემი ლექსია,

გულს წამართმევენ, ეს იმას ნიშნავს

სიცარიელეს აღარ ესვრიან.

გამოცხადდება რომ მეკრძალება

ტკივილი, ლექსში აღარ ვახსენო,

ხვალ შეუძლიათ გასცენ ბრძანება,

რომ უკვე მოგვკვდი, აღარ ვარსებობ.

ხვალ სასამართლო იმსჯელებს ჩემზე,

სიტყვას მისცემენ მსაჯულს ნაფიცებს,

მაინტერესებს, ვისაც გული აქვს,

ჩემს უგულობას რით დაამტკიცებს.