გიმზერ, გიყურებ და მე ვღონდები

და ვრჩები შიშველ ფიქრის ამარა.

მე ვაკვირდები და მაგონდება

ყველა ლამაზი ქალის სამარე.

ვიცი, ვინ იყავ, ვიცი, ვინა ხარ

და მე მაჟრჟოლებს ნახვა ბალახის.

მე შენი სახის ეშხი მინახავს,

შენი სიბერე არ დამანახო.

ის ოცნებები მომყვა აქამდე,

ბავშვობის წლებში რომ გავახარე,

სანამ შენს გათხრილ საფლავს ვნახავდე,

მიწა თვითონვე შემომაყარე.

გიმზერ, გიყურებ და მე ვღონდები

და ვრჩები შიშველ ფიქრის ამარა.

გიმზერ და... ნეტავ, რად მაგონდება

ყველა ლამაზი ქალის სამარე.