უარყო თომამ მკვდრეთით აღდგომა,

ვეღარ მოეგო მოწაფე მცნებას

და, როგორც სხვებმა მოციქულებმა, 

ვერ დაუმონა გონება გრძნობას...

არიან ჩვენშიც თომასთანები, 

რომ არ სწამთ ქვეყნის მათ მომავალი, 

დღევანდელ ჯვარცმით გულგატეხილებს

საშორსმხვედველოდ არ უჭრით თვალი.

მაგრამ როდესაც თვით მომავალი

მათ წარუდგებათ, ვით ქრისტე თომას,

დაიჯერებენ, რაც დღეს არა სწამთ

და დაიტკბობენ მწარე გულისთქმას.

მანამდე კი ჩვენ ვიტყვით და ვამბობთ

(თუმც დასაჯერი ჯერ კი ძნელია, 

რომ სდგება ქრისტე! ის, ვინც სიკვდილით

სიკვდილისავე დამთრგუნველია.