შენ ხარ ღვთაება

ამქვეყნიური,

შენ ხარ ოცნება

ნაზი, ციური;

შენ ხარ მთის წყარო ტკბილმოკამკამე...

...შენი კვნესამე!...

მხოლოდ შენთვის სტვენს

ნაზად ბულბული,

შენ არეს აფენს

სურნელს სუმბული;

შენთვის ბიბინებს, თვით მდელო მწვანე...

...შენ გენაცვალე...

შენსკენ ისწრაფის

ობოლი გული,

სული იტანჯვის

სევდით მოცული

ერთხელ მომფინე, მზეო, სიცოცხლე...

...თავს შემოგევლე...

ცით მონაბერო

სულო ციურო

მსურს, მშვენიერო

სულ შენ გიმღერო;

მსურს შენსა მკერდზე დავლიო დღენი...

...ჭირიმე შენი...